Говь-Алтай аймгийн Алтай суманд өчигдөр /2021.08.18/ 15:30-16:10 цагийн хооронд хүчтэй аадар бороо орсоны улмаас үер буужээ. Улмаар аж ахуй нэгж, албан газрын зоорийн давхарт үерийн ус орсон тухай 8 дуудлага, айлын хашаа, гэрт ус орсон тухай 29 дуудлага, нийт 37 дуудлага  тус аймгийн Онцгой байдлын газарт ирсэн байна. 

Дуудлагын дагуу 5 ажлын хэсэг зохион байгуулан алба хаагчид ажиллаж 5 айлын 8 иргэнийг аюулгүй газар нүүлгэн шилжүүлж, “Түмэн”, “Жаргалант”, “Харзат”, “Баянхайрхан”, “Оргил” багийн 23 айлд заавар зөвлөгөө өгч, суваг шуудуу татаж үерийн усыг урсган, “Алтай” чуулгын 200 мкв автомашины тавиулан, “Ундарга-Алтай” ОНӨААҮГ, “Төрийн банк”-ны байрны 205 мкв зоорийн давхарт үерийн ус орсоныг соруулж гаргах арга хэмжээ авч ажиллалаа гэж Говь-Алтай аймгийн Онцгой байдлын газраас мэдээллээ.

Говь-Алтай аймгийн Алтай суманд энэ онд нар салхины станц ашиглалтад орно. Тус суманд эрчим хүчний асуудал хамгийн ихээр тулгамдаж буй талаар сумын Засаг дарга Цэрэвсамбуу мэдээлэв. 2010 онд нарны сэргээгдэх эрчим хүчийг барин ашиглалтад оруулсан хэдий ч цэнэг хураагуурын ашиглалтын хугацаа дууссан байна. 

Иймээс тус суманд өнгөрсөн онд Азийн хөгжлийн банкны 92 мянган долларын санхүүжилтээр 450кВ-н хүчин чадалтай нарны станц, 200кВ-н салхин станц барихаар бүтээн байгуулалтын ажлаа эхлэхэд бэлэн болоод байгаа ажээ. Түүнчлэн энэ онд улсын болон орон нутгийн төсвийн хөрөнгө оруулалтаар ЗДТГ-ын барилга, эмнэлгийн барилгын өргөтгөл, жишиг гудамж, спорт заал ашиглалтад орох ажээ. Алтай сум нь Монгол Улсын баруун хязгаарт БНХАУ, Бугат, Төгрөг, Цээл сумтай хиллэн оршдог бөгөөд Улаанбаатар хотоос 1365 км, Говь-Алтай аймгийн төвөөс 365 км-т оршдог юм.  

Э.Нарангэрэл

Боловсролын магадлан итгэмжлэх үндэсний зөвлөлийн ажлын албанаас “Боловсролын чанар-хөгжил” сургалтыг Говь-Алтай аймгийн Алтай хотноо зохион байгууллаа. 

Уг сургалт Алтай хотноо хоёр хоногийн турш үргэлжилж нэгдүгээр сарын 17-ны өдөр Ерөнхий боловсролын сургуулиудын төгсөх ангийн сурагчдад “Магадлан итгэмжлэл ба мэргэжил сонголт” сэдвийн дор явууллаа. Сургалтаар ЕБС-ийн төгсөх ангийн сурагчдад мэргэжлээ сонгоход нь туслах зорилгоор магадлан итгэмжлэгдсэн их дээд сургуулийн талаарх мэдээлэл мөн нийгэмд эрэлттэй мэргэжлүүдийг танилцуулсан юм. 

"Есөнбулаг сумын  сургуулиудын 11-12-р ангийн 619 сурагчид мэргэжлээ сонгоход туслах, магадлан итгэмжлэгдсэн их дээд сургуулийг танилцуулах,  ажил мэргэжлийн чиг хандлагыг танилцуулах ач холбогдолтой  ажил боллоо" хэмээн тус аймгийн Боловсрол, соёл урлагийн газраас онцоллоо.

Нэгдүгээр сарын 18 буюу сургалтын сүүлийн өдөр тус аймагт үйл ажиллагаагаа явуулж буй их дээд сургууль, мэргэжлийн боловсрол, сургалтын байгууллагын удирдлага, багш, албан хаагчдад боловсролын салбарын хөгжил, чиг хандлагыг танилцуулах, хэтийн төлөвлөгөөг боловсруулахад нь дэмжлэг үзүүлэх зорилгоор сургалтаа үргэлжлүүллээ. "Боловсролын чанар- хөгжил" сургалтыг Боловсролын магадлан итгэмжлэх үндэсний зөвлөл, Говь-Алтай аймгийн ЗДТГ, БСУГ хамтран зохион байгуулжээ.

Э.Нарангэрэл

Говь-Алтай аймгийн Засаг даргын захирамжаар 2019 оны хоёрдугаар ээлжийн цэрэг татлагыг энэ сарын 14-16-ны өдөр Мэргэжлийн сургалт үйлдвэрлэлийн төвд явуулна. Тус аймгийн 18 сумын 87 багийн 18-25 насны залуус дээрх өдрүүдэд эрүүл мэндийн үзлэг, бүртгэлийн үйл ажиллагаанд хамрагдах юм. Цэрэг татлагийн албанд Ховд, Баянхонгор аймаг болон Алтай сумын хилийн цэрэг, зэвсэгт хүчний анги нэгтгэлүүд залуусыг хуваарилан авна.

Ховд аймгийн Үенч сумын хувьд тэртээ 1934 оноос эхлэн Говь-Алтай аймгаас цэрэг татаж байсан юм. Харин жилийн өмнөхөн л эх орондоо тангараг өргөн албандаа мордсон залуус аравдугаар сарын 15,16-нд аав, ээж, төрөлх нутагтаа ирнэ. Тодруулбал, зэвсэгт хүчинд алба хааж байгаа цэргүүд 15-нд, хилийн цэрэгт алба хааж байгаа цэргүүд 16-нд Алтай хотод ирнэ. 

Э.Нарангэрэл