“Амин Итгэл” НҮТББ-аас Говь-Алтай аймгийн Дэлгэр сумын Гуулин тосгоны Соёлын төвийн засвар, шинэчлэлийн ажлыг энэ оны найман сард багтаан бүрэн хийж дуусгахаар төлөвлөсөн байна.

Тодруулбал, Дөрөвдүгээр сарын 15-ны өдөр тус аймгийн Засаг даргын үүрэг гүйцэтгэгч Ж.Ганбат Гуулин тосгоны Соёлын төвийн засвар, шинэчлэлийн ажлыг үе шаттай төлөвлөгөө гарган гүйцэтгэж байгаа “Амин Итгэл” НҮТББ-ын тэргүүн Ү.Дэлгэрмаатай уулзаж 2020 онд хийх ажлын төлөвлөгөөг танилцуулан санал солилцлоо. 

Тус ТББ-аас өөрийн хөрөнгөөр 2019 оны 11 дүгээр сард үзвэрийн танхимыг тохижуулсан юм. Харин энэ оны дөрөвдүгээр сард эрхлэгчийн өрөө, номын сан, тайзны арын хувцас солих өрөө, уран сайханчдын өрөө, техникийн өрөөг, наймдугаар сард сантехникийн иж бүрэн шинэчлэл, гадна талбайн тохижилт, гадна фасад, гэрэлтүүлгийн ажлыг гүйцэтгэхээр төлөвлөжээ. Төсөл хэрэгжих хугацаанд нийт 668.800.000 төгрөгийн тохижилтын ажлыг гүйцэтгэхээр “Амин Итгэл НҮТББ-аас тооцоолсон байна.

Э.Нарангэрэл

Говь-Алтай аймгийн Дэлгэр сумын Баянхонгор багийн нутагт гуравдугаар сарын 28-нд малчны хотны ойролцоо цоохор ирвэс иржээ. Тодруулбал, тус аймгийн БОАЖГ-т малчны хотны ойролцоо цоохор ирвэс байгаа тухай дуудлага ирсний дагуу тус газрын мэргэжилтэн, сумын Засаг дарга, БОХУ-ын байцаагч, байгаль хамгаалагч, хэсгийн төлөөлөгчийн хамт газар дээр нь ажиллажээ. Тэд Баянхонгор багийн нутагт байршсан газраас цоохор ирвэсийг 18 км газар харгалзан тууж уулын бүс рүү ойртуулж хамгаалах үйл ажиллагааг зохион байгуулсан байна. Мөн малчид ард иргэдэд холбогдох хууль тогтоомж, анхааруулга санамжийг өгсөн юм. Дэлгэр сумын Баянбууралын нуруу, Сэрхийн нуруу гэх мэт газарт цоохор ирвэс хоол тэжээл хайн шилжилт хөдөлгөөн хийж байршин нутагладаг тухай тус сумын Байгаль орчны улсын байцаагч Л.Эрдэнэтуяа  мэдээллээ.

Э.Нарангэрэл

Өчигдөр ГАА - ийн Дэлгэр сумын Дэлгэрийн тал, Хонгор толгой орчимд мазаалай үзэгджээ. Хаа байгаа Алтайн өвөр говиос, 300-400 км алсад, өөрсдийнх нь хэзээ ч амьдарч байгаагүй тал хээрийн хүн амьтан хольхсон бүсэд, өөрсдийнх нь иддэг идэш хоол багатай газарт мазаалай ирсэн нь нэн ховор үзэгдэл шүү. Зургийг нь авах гэж л хэдэн сар сахидаг нэн ховор амьтан шүү дээ. 
Учиргүй эцэж турсан шинжгүйг үзвэл идэш хоолны эрэлд гарсан гэхээргүй. Нэг л онцгой юм болж дээ.