БНСУ-ын супер од Rain, Sandara Park, Bloo нарын тоглолтын тасалбарыг худалдан авахад 50%-ийн буцаан олголт өгнө гэвэл та итгэх үү? ХААН Банк энэхүү гайхалтай боломжийг харилцагчдадаа олгож байна.

Та тоглолтын тасалбарыг зөвхөн маргааш буюу 2024 оны 9-р сарын 10-ны өдрийн 12:00-00:00 цагийн хооронд Digi Pay аппликэйшн доторх Shoppy.mn мини апп-аар худалдан аваарай.

Буцаан олголтын нөхцөл:

• Буцаан олголт авахын тулд Digi Pay аппликэйшн доторх “Үйлчилгээ” цэсний Shoppy.mn мини апп-аар худалдан авалт хийх шаардлагатай.
• Нэг харилцагчид өгөх буцаан олголтын дээд хэмжээ 100,000₮ байна.

Буцаан олголтын хугацаа:

• Буцаан олголт 2024 оны 9-р сарын 13-ны өдөр таны данс руу шилжин орно.

Digi Pay аппликэйшнийг дараах холбоосоор татаж авна уу: https://bit.ly/Digi_Pay

Санхүүгээ хэмнэхийн зэрэгцээ Солонгосын супер оддын тоглолтыг үзэх алтан боломжийг та битгий алдаарай!

Хамтын өсөлт төгөлдөр – ХААН Банк

Хүний амьдралын мөчлөг, сэтгэлийн дотоод гуниг баясал нь байгалийн мөчлөгтэй адил мөхөж бас сэргэж байдаг. Орчлонгийн бүх зүйл өөрийн замналаар урсана, хайлна, нүүнэ, бас үгүйрнэ. Энэ ертөнцийн жам ёсыг хүлээн зөвшөөрч, амьдралын урсгалыг сөрөн явахдаа сайн мууг дэнслэхийн оронд, түүнийг зөнгөөр нь орхих, урсан өнгөрөх цаг хугацааг “Зааг” үзэсгэлэн дүрслэн харуулжээ.

Австралийн Сиднейн их сургуульд медиа урлагийн ахлах багш, саунд артист, судлаач Диана Честер, орчин цагийн Монголын залуу уран бүтээлч Ж.Ариунтуяа нарын хамтын онцгой содон мультимедиа арт үзэсгэлэн ХААН галерейд нээгдээд удаагүй байна.

Монголын урлагийн ертөнцөд шинэ хуудас нээсэн, экспериментал хөгжим, дүрслэх урлагийн олон улсын “ХAOS” фестивалийн хүрээнд энэхүү үзэсгэлэнг толилуулж буй. Диана, Ариунтуяа нар үзэсгэлэнгийнхээ санаа, төслийг жилийн өмнөөс эхлүүлсэн аж. Тэд хамтдаа Монголын говь нутгаар 1000 гаруй км зам туулж, Хонгорын элс, Баян заг, Ёлын ам, Мухар шивэрт зэрэг газраар аялж, ширгэсэн булаг шанд, гол мөрөн, гүн мөсөн хавцал, палеонтологийн олдвор бүхий газар, элсэн цөлийн тогтоцыг судлан, дүрсжүүлж, үзэсгэлэнгийн бүтээлүүдээ туурвижээ.

Аяллын үеэр авсан дүрс, дуу бичлэг буюу булаг оргилох, мөс хайлах, элс нүүх, манхан хүнгэнэх чимээ авиа нь үзэсгэлэнгийн бүтээлүүдэд “амилж”, байгалийн гоо сайхныг, түүний дотоод амар амгаланг үзэгчдэд мэдрүүлээд зогсохгүй амьдралыг анирдах, туулсан зам, гаргасан тэвчээрийг энэрэх сэтгэлийг танд төрүүлэх нь лавтай.

“Зааг” үзэсгэлэн нь зөвхөн урлагийн бүтээл биш, харин амьдралын утга учрыг нээх аялал гэж хэлж болно. Амьдралын заагийг шинэ өнцгөөс харах, түүний гүн утгыг ухаарах энэхүү үзэсгэлэн нь таныг гайхашруулж, сэтгэл зүрхийг тань хөдөлгөнө гэдэгт итгэлтэй байна.

Үзэсгэлэн ХААН Банкны төв оффисын 3-р давхарт байрлах ХААН галерейд 2024 оны 5-р сарын 29-нийг дуустал ажлын өдрүүдэд 09:00-18:00 цагийн хооронд нээлттэй байна.

Уран бүтээлч Луо Чи

Бодол, мэлмийд төсөөлсөн бүхнээ нүднээ ил буулгаж чаддаг нь гагцхүү уран бүтээлч хүн заяагдсан хамгийн гайхалтай чадвар юм. Уран бүтээлчийн толгойд “нэрэгдэж” гагц охь шимийг нь л шүүж, оюун бодол, харах нүдийг нь хамтад нь баясгах чадвартай бүтээл туурвина гэдэг хүндхэн сорилт болдог нь лавтай.

Португал улсад амьдардаг Хятадын нэн орчин үеийн чиглэлээр бүтээлээ туурвигч уран бүтээлч  Луо Чи “Итиопын тэмдэглэл” бие даасан өрөг урлагийн үзэсгэлэнгээ ХААН галерейд олон нийтэд дэлгэжээ.

Энэхүү үзэсгэлэн бүхэлдээ торгон хэвлэлийн хэсгээс бүрдэх бөгөөд энгийн атлаа гүн гүнзгий утга агуулга бүхий хийсвэр ертөнцийг дүрсэлсэн аж. Торгон хэвлэл дээрх зургуудыг сайн ажваас тодорхой бус эртний бичиг мэт уран бичлэг дүрс тэмдэг, түүний хажууд дундад зууны үеийн хаад, хатад, хуяг дуулгат баатар эрс, бурханчилсан хүний дүрс, хээ, тэмдэг зэрэг нь нэгэн орон зайд оршин зурагдсан нь бодолд л биеллээ олох шидэт ертөнцийг өөрийг эрхгүй санагдуулна.

Уран бүтээлч Луо Чи бүтээлүүддээ өрнөдийн дундад зууны үеийн урлагийн хэлбэр, өнгө төрх болон Дорнын эртний бичээс, уран бичлэгийн хэв маягаас санаа авч өөрийн бодлын ертөнцөө бодит болгосноороо онцлог юм. Нөгөөтэйгүүр Хятадын уран бичлэг, чөлөөт бичлэгийн арга барилаар бүтээлээ туурвисан нь баригдмал үзэл бодлын чөлөөт дүрслэл мэт сэтгэгдэл төрүүлнэ.

Өнгөрсөн, одоо, ирээдүй гурван цагийн огтлолцол болсон “Итиопын тэмдэглэл” үзэсгэлэн ХААН Банкны төв оффисын 3-р давхарт байрлах ХААН галерейд 2024 оны 3-р сарын 29-нийг дуустал 09:00-18:00 цагийн хооронд нээлттэй байна.

“...Бид соёлын асар хурдацтай шилжилт хөдөлгөөний хязгаар үл үзэгдэх орон зайд эцсийн зогсоол үгүй мэт аялах зорчигчид юм. Агуулга хэлбэрээ зогсолтгүй солих хурдтай нийгэмд хөөгдөн амьдарч байна. Энэ бүхний цаана орших мөн чанар, үнэ цэн юу вэ?

Үзэгдээд, шүргээд өнгөрөх хүчтэй хөөсрөн нэг л мэдэхэд алга болох мэт ахархан бус, хайр тэр дундаа өөрт байгаа, өөртөө зориулсан бүхнээ үнэ цэн, утга төгс байлгаасай хэмээн хүснэ. Тэгж чадваас байгаль эхэд өгч чадах бидний хайр халамж гоо үзэсгэлэн бишрэм чанар нь энэ болой” хэмээн “Ангид оршихуй” медиа арт үзэсгэлэнгийн арт директор, NOEMI брэндийг үүсгэн байгуулагч Э.Номинчулуун бичжээ.

Урлаг тэр дундаа дүрслэх урлагийн уран бүтээлийг өөртөө шингээн, хувь хүний өнгө төрхийг энгийн хэрнээ дахин давтагдашгүйгээр илэрхийлсэн хэв загвар бүхий ноолууран хувцасны NOEMI брэндийн хавар, зуны загварын коллекцийн танилцуулга үзэсгэлэн ХААН галерейд нээгдээд удаагүй байна.  

“Ангид оршихуй” медиа арт үзэсгэлэнд Монгол оронд түгээмэл ургадаг монос модыг сонгон жилийн дөрвөн улиралд хувьсан өөрчлөгдөх өнгө төрх буюу цаг хугацаанаас ангид орших үзэл санааг тусган харуулсан бөгөөд бүхэлдээ дотоод гоо сайхан, хүний сэтгэлд орших тэрхүү тансаг мэдрэмжийг илтгэхийг зорьжээ. Үзэсгэлэнгийн куратороор уран бүтээлч Ц.Солонго, арт директороор Э.Номинчулуун нар ажиллаж, NOEMI брэндийн үзэл санаанд тулгуурлан уран бүтээлч Э.Билигт монос модон дээр барлан, медиа артыг уран бүтээлч Г.Мөнхболор, Х.Одбилэг, саунд артыг У.Золбоо бүтээсэн байна.

“Ангид оршихуй” нэн орчин үеийн медиа үзэсгэлэн ХААН Банк цамхагийн 3-р давхарт байрлах ХААН галерейд 2024 оны 2-р сарын 29-ний өдрийг хүртэл ажлын өдрүүдэд 10.00- 18.00 цагт үнэ төлбөргүй нийтийн хүртээл болж байна. 

Соёл урлаг, хэвлэл мэдээллийн төслийн менежмент, зөвлөгөө НҮТББ болон “НордАрт” - олон улсын дүрслэх урлагийн үзэсгэлэн хоорондын хамтын ажиллагааны хүрээнд олон улсын нэр хүндтэй уран бүтээлчдийг Монголд урьж оролцуулсан “МонголианАрт” олон улсын уран баримлын симпозиум 8-р сарын 4-нөөс 8-р сарын 21-ний хооронд Тэрэлж байгалийн цогцолбор газарт байрлах “Гүрү Эко” цогцолборт амжилттай зохион байгуулагдсан билээ.
Симпозиумын үеэр туурвигдсан томоохон бүтээлүүдийн “Public Art - Urban Sculpture” үзэсгэлэн 8-р сарын 24-ний өдөр ХААН Банк цамхгийн гадна талбай болон Хаан Галарейд нээгдлээ.
Нээлтийн ажиллагаанд тус симпозиумын албан ёсны түнш НЗД-ын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн, ХБНГУ-аас Монгол Усад суугаа Онц бөгөөд Бүрэн эрхт элчин сайд Хэлмут Кулитц, Төслийг санаачлагч, зохион байгуулагч, Монгол Улсын Соёлын элч О.Оюунтуяа, дэмжигч ХААН Банкны Өмчийн харилцааны газрын захирал О.Тэмүүлэн оролцлоо.
Энэ үеэр Элчин сайдХэлмут Кулитц “Урлагт аливаа соёл болон хэлний хил хязгаар гэж үгүй бөгөөд орчуулах шаардлагагүй бүх нийтийн хэл юм. Сүүлийн есөн жилийн хугацаанд Монгол Улс болон НордАрт үзэсгэлэнгийн хоорондын хамтын ажиллагаа хэрхэн цэцэглэн хөгжиж байгааг хараад үнэхээр их урам зориг авч байна” гэв.
Мөн НЗД-ын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн “Энэхүү олон улсын уран баримлын симпозиумын арга хэмжээ нь Монгол Улсын Засгийн газраас зарласан “Монголд зочлох жил”-тэй уялдан холбогдож байгаа бөгөөдцаашид олон жил зохион байгуулагдана гэдэгт итгэж байна. Эдгээр бүтээлүүд нь улаанбаатарчуудын нүд, сэтгэлийг баясгаж, нийслэл хотын гудамж, зам талбайг чимэхээр болж байгааг харахад таатай байна” гэлээ.
Энэ жилийн “МонголианАрт” уран баримлын симпозиумын үзэсгэлэнд Монгол, Герман, Итали, Испани, Болгар, Эстони, Өмнөд Солонгос зэрэг долоон орны есөн уран бүтээлч оролцож байгаагаас симпозиумын үеэр зургаан уран барималч Монголын байгалийн боржин чулуу, ган, төмрөөр томоохон бүтээлүүдээ туурвиж, гурван уран бүтээлч нь бэлэн бүтээлээрээ үзэсгэлэнд оролцож байна.
Үзэсгэлэнгийн куратороор О.Оюунтуяа, Ц.Солонго нар хамтран ажилласан бөгөөд ХААН цамхгийн гадна талбайд байршсан томоохон бүтээлүүд болон ХААН Галерейд тавигдсан уран бүтээлүүд нэн орчин үеийн баримлууд нийтийн хүртээл болж байгаагаараа онцлог боллоо. Уран бүтээлчид Монгол орны байгалийн сайханд онгодоо хөглөн, түүх соёлоос төрсөн сэтгэгдэл мэдрэмжээ өөрсдийн бүтээлдээ шууд тусган буулгажээ. Өмнөд Солонгосын уран бүтээлч Ёнгсун Жан “Надад Монгол гэхээр хамгийн түрүүнд хээр тал, салхи, элсэн цөл, нарны хурц туяа санаанд ордог. Би энэ удаагийн Монгол дахь симпозиумд эдгээр төсөөллөө ашиглан “Шиморин Бризз” сэдэвт бүтээлээ туурвиж байна. Говь хэмээх хязгааргүй элсэн цөлд сэвэлзүүр салхи эрх дураараа хийсэж буй ийм дүрслэлийг өөрийн жижиг ган цагариг холбоос бүхий бүтээлээрээ илэрхийлэхийг хичээлээ” хэмээв.
Болгарийн уран бүтээлч Лилия Поборникова “Би Монголд анх удаа ирээд байгалийн сайхан орчинд ажиллаа. Миний баримлын нэр бол “Уулзвар”. Хоёр төрлийн дүрсийг зохицуулж хослуулснаар бид амьдралдаа янз бүрийн сонголт хийж төрөл бүрийн зам жимийг гаргадаг гэсэн утга агуулсан. Миний бүтээл анхны загвараасаа өөрчлөгдсөн. Учир нь хүрээлэн буй орчноосоо өөр онгод мэдрэмж аваад түүнийгээ бүтээлдээ шингээж бүтээлийнхээ анхны санаагаа өөрчлөн, авчирсан загвар моделиосоо ялгаатай болсон” хэмээн бүтээлүүдийнхээ туурвилын талаар хуваалцсан юм.
МонголианАрт олон улсын уран баримлын симпозиум нь Монгол Улсын ба олон улсын шилдэг уран бүтээлчдийн хоорондын мэргэжлийн туршлага, соёлын солилцоо, оюутан залуучууд, иргэдэд урлаг соёл, гоо зүйн боловсрол олгох, мөн гадаад сурталчилгаа, соёлын аялал жуулчлалд хувь нэмэр оруулж олон улсын уран бүтээлчид болон НордАрт-ын Зүүн Өмнөд болон Төв Азийн жуулчид, үйлчлүүлэгчдийн урсгалыг Монгол улс руу татах онцгой ач холбогдолтой.
“МонголианАрт” олон улсын уран баримлын симпозиумын үзэсгэлэн нь ХААН Банк цамхгийн олон нийтэд нээлттэй орчинд, харин НордАрт-ын уран бүтээлчдийн хамтарсан үзэсгэлэн Хаан Галерейд 9-р сарын 30-ыг хүртэл олны хүртээл болно. Уран бүтээлүүд дээр байршигдах Dynamic QR код бүхий интерактив коммуникаци сурталчилгаагаар дамжуулан уран нбүтээлийн тухай бүхий л талын мэдлэг, мэдээллийг англи болон монгол хэл дээр авах боломжтой.
Энэхүү арга хэмжээ нь 2024 онд тохиох Монгол Улс, ХБНГУ-ын хооронд дипломат харилцаа үүсэж хөгжсөний 50 жил, НордАрт, Монгол Улс хоорондын хамтын ажиллагааны 10 жилийн ойг тус тус угтан зохион байгуулагдаж байгаа бөгөөд 2024 оноос эхлэн Монгол Улсад цаашдаа гурван жил тутамд зохион байгуулагдана.

Хүний дотор орших сүнсэн бие нь өөрийн болоод бусдын сайн сайхны тусын тулд тасралтгүй хичээн, сав шим ертөнцөөр эрэл хайгуул хийн, дахин давтагдашгүй зам мөр гарган буйг дүрслэх хүмүүсийн амьдрал... Бодгаль бүхэн өөрийн хүсэл тэмүүлэл, зорилгод хөтлөгдөн эрэл хайгуул хийх ч төгс биелэх аргагүй, хязгааргүй орон зайд оршин буйгаа үл мэднэ...

Хүмүүний оршихуйн мөн чанарыг таних далд ухамсрын эрэл хайгуулыг сүнсэн биеийн аяллаар төлөөлүүлж, хулдаасан барын арга техник ашиглан дүрсэлсэн сюрреалист уран бүтээлч С.Ихбаяр, Э.Билигт нарын хамтарсан “ХҮН ДҮҮРЭН ТАЛ” үзэсгэлэн ХААН галерейд нээгдээд удаагүй байна.

Тус үзэсгэлэн нь уран бүтээлч С.Ихбаярын 2017 онд бичсэн “Хүн дүүрэн талд” богино хэмжээний өгүүллэгээс сэдэвлэсэн бөгөөд хоёр уран бүтээлч өөр өөрсдийн  уран бүтээлийн онцлог, арга зүйг тусган, сюрреалист урсгалаар дүрслэн харуулснаараа өвөрмөц юм. Сюрреализм нь 100 жилийн өмнө Франц улсад үүссэн, аливаа юмс үзэгдлийн өнгөн талыг бус түүний цаана орших далд мөн чанарыг амьдрал дээр үл оршин байх, зөвхөн зүүд нойрны эсвэл оюун санааны төсөөллийн ертөнцөд учирч болох хийсвэр үзэгдэл, мэдрэмж, төсөөллийг уран сэтгэмжээр бодит болгон үзүүлдэг урлагийн төрөл юм.

Уран бүтээлч С.Ихбаярын хувьд хүүхэд байхаасаа богино хэмжээний өгүүллэг бичиж эхэлсэн бөгөөд сүүлийн 6 жилийн хугацаанд хийсэн ажиглалт, түүнээс төрсөн мэдрэмж болон төсөөлөл, зүүд ба зөн совин, бодлын тэмдэглэлүүдээс бүтсэн "ЭРГЭМЭЭР" нэрт богино хэмжээний өгүүллэгийн түүвэр номоо ийнхүү дэлгэн танилцуулж байгаа билээ.

Уран бүтээлч Э.Билигтийн хувьд үзэсгэлэнгээр дэлгэн танилцуулсан бүтээлүүдээ зураасан зургийн техник ашиглан ХУЛДААС БАРЛАХ  аргаар бүтээсэн байна. Ингэхдээ хүмүүсийн дүрсийг сийлбэрлэн зурж, улмаар хэвлэн барлаж, танхимын орон зайд байрлуулсан нь уран бүтээлчийн зүгээс өндөр мэдрэмжтэйгээр чадварлаг гүйцэтгэсэн, хийцлэлийн хувьд цоо шинэ өнгө төрхийг агуулсан бүтээл болжээ.

“ХҮН ДҮҮРЭН ТАЛ” үзэсгэлэн 2023 оны 2-р сарын 28-ны өдрийг дуустал ХААН галерейд үзэгч олны хүртээл болно.

Холливүүдийн нэрт продюсер Харви Уэйнштэйнд Нью-Йоркийн шүүхээс 23 жилийн ял оноожээ. Гуравдугаар сарын 11-ний өдөр болсон шүүх хурал дээр ял сонсохынхоо өмнө 67 настай тэрээр "Би энэ байдалд үнэхээр харамсаж байна. Цаашид би бүх цаг хугацаагаа илүү сайн хүн болохын төлөө зориулна" хэмээн хэлжээ. 

Эх сурвалж: CNN

Гэвч Уэйнштэйн компанид туслах ажилтнаар ажиллаж байхдаа 2006 онд түүний хүчирхийлэлд өртсөн гэж шүүхэд гомдол гаргасан Мириам Халэй, 2013 онд мөн хохирогч болсон жүжигчин Жессика Манн нарын мэдүүлэгт үндэслэн шүүх хурлаас Харви Уэйнштэйнд ийнхүү 23 жилийн ял оноосон байна. 

Эх сурвалж: CNN

Зургийн тайлбар: Зүүн гар талаас Лорен Янг, Жессика Манн, Даун  Даннинг нар шүүхийн тогтоолыг сонсоод гарч яваа нь 

Холливүүдэд нөлөө бүхий Уэйнштэйн кино уран бүтээлд нь тусалж, од болгох нэрийдлээр олон тооны эмэгтэйд бэлгийн дарамт үзүүлж, заримыг нь хүчиндсэн хэрэгт буруутгагдан 2018 оны тавдугаар сард баривчлагдаж байв. Харин энэ хэргийг анх сэтгүүлч Ронан Фэрроу эрэн сурвалжилж, 10 гэрчийн мэдүүлэгтэйгээр  2017 онд нийтэд ил болгосон юм.

Түүний нийтлэлийн дараа Харви Уэйнштэйний хүчирхийлэл, бэлгийн дарамтад өртөж байсан эмэгтэйчүүд, нэртэй жүжигчид ам нээж эхэлсэн бөгөөд эмэгтэйчүүдийн хүчирхийллийн эсрэг #MeToo хөдөлгөөн дэлхий даяар өрнөж эхэлсэн билээ. 

Б.Жаргалмаа 

Эх сурвалж: CNN