Алжир Марокко улстай дипломат харилцаагаа тасалжээ

 

Хөрш Марокко улстай дипломат харилцаагаа тасалсан тухай Алжирын Гадаад хэргийн сайд Рамтан Ламамра мягмар гарагт мэдэгджээ. Түүний мэдэгдсэнээр, Мароккогийн дайсагнасан үйлдэл дипломат харилцаагаа таслах шалтгаан болсон байна. Тус улсыг Алжирт үйл ажиллагаа явуулдаг хоёр "террорист хөдөлгөөн"-ийг дэмжсэн зэрэг олон гэмт хэрэгт буруутгаж байгаа ажээ. Эдгээр нь Алжирын хойд хэсэгт гарсан ойн түймрийг тавьсан гэж сэжиглэгдэж байгаа "Кабилиягийн өөртөө засан тохинох эрхийн төлөөх хөдөлгөөн" болон лалын шашинтнуудын “Рашад” бүлэглэл юм. Кабилия нь хүн ам шигүү суурьшсан, бербер хэлээр ярьдаг, Газрын дундад тэнгисийн бүс нутаг юм.

"Марокко тусгаар тогтнолоо олж авснаас хойших түүхийнхээ хугацаанд манай улсын эсрэг өдөр бүр бузар муу үйл хийсээр ирсэн" гэж дипломатч цохон хэлжээ. "Марокко улс Алжирын аюулгүй байдлыг алдагдуулахын тулд террорист бүлэглэлүүдтэй нэг бус удаа хамтран ажилласан. Үүнээс гадна, Мароккогийн тусгай албаныхан Алжирын албан тушаалтнуудыг тагнаж мөрдсөн гэх мэдээлэл бий" гэж Ламамра мэдэгдсэн байна.  

Алжирын энэхүү алхмын хариуд Мароккогийн Гадаад хэргийн яамнаас мэдэгдэл хийж, дипломат харилцаагаа таслах шийдвэрийг "огт үндэслэлгүй" бөгөөд "худал", "утгагүй шалтаг"-т үндэслэсэн гэж мэдэгджээ.