Орос-Украины зөрчил эдийн засгийн хэтийн төлөвийг тодорхойгүй болгож байна
Дэлхийн эрчим хүчний үнийг өсгөж, дүрвэгсдийн томоохон хямрал үүсгээд байгаа Орос-Украины зөрчил АНУ-ын эдийн засгийн хэвийн төлөвийг тодорхойгүй болгож, өсөлтийг нь сааруулах төлөвтэй байна гэж Америкийн “The Boston Globe” сонинд мэдээлжээ.
Олон улсын валютын сангийн /ОУВС/ тэргүүн Кристалина Георгиева, “цар тахлын улмаас урьд хожид байгаагүй хямралыг даван туулж байгаа энэ үед улам цочирдом нөхцөл байдал бий болж байна” гэж хэлснийг сонины мэдээнд уламжилсан байна. Мөн ОУВС үүсээд буй зөрчилтэй холбоотойгоор дэлхийн эдийн засгийн өсөлтийн төсөөллийг бууруулах төлөвтэй байгааг тэрбээр хэлжээ. Хөндлөнгийн шинжээчдийн хувьд АНУ-ын эдийн засгийн өсөлтийн таамаглалыг бууруулаад байгаа бөгөөд саяхан “Goldman Sachs” хөрөнгө оруулалтын банк уг үзүүлэлтийг 1.75 хувьд хүрнэ гэж таамагласан байна.
Үүнээс гадна “COVID-19” цар тахлаас үүдэлтэй эдийн засгийн үр дагавар дуусах болоогүй байна. Тухайлбал, халдварлах чадвар өндөр “омикрон” хувилбарын “BA.2” дэд хувилбарын улмаас Европын зарим оронд халдварын тохиолдлын тоо нэмэгдэх болоод байгаа юм. “American Action Forum” институтын тэргүүн Дуглас Хольц-Икиний хувьд инфляцыг бууруулж, үнийг өсөлт цаашид хэвээр үлдэх вий гэсэн америкчуудын болгоомжлолыг арилгахын тулд хүүг өсгөх АНУ-ын Төв банкны төлөвлөгөөтэй санал нэг байгаагаа илэрхийлжээ. Тэрбээр, Байдены засаг захиргаа Украинд дайныг зогсоож, “COVID-19”-ийн өвчлөл дахин нэмэгдэхэд бэлтгэлтэй байхад анхаарлаа хандуулах хэрэгтэй гэжээ.
Өндөр инфляци, хүүгийн өсөлт зэрэг нь энэ жил хэрэглэгчдэд хүндрэл учруулна гэж эдийн засагчид үзэж байна. Хууль тогтоогчид мөн эдийн засгийн хүндрэлийг багасгахын тулд нефтийн компаниудын өндөр ашигт татвар ногдуулах, шатахууны үнийг бууруулахын тулд холбооны татварыг түр тэглэх зэрэг саналуудыг дэвшүүлж байгаа ажээ. Эдийн засагчдын хувьд тодорхойгүй байдлаар дүүрэн дахин нэг жил ирж буйг америкчуудад анхааруулж байгааг сонины мэдээнд дурджээ.
Э.Хулан
Эх сурвалж: "Монцамэ" агентлаг
Санал болгох
Сэтгэгдэл бичих
АНХААРУУЛГА: Уншигчдын бичсэн сэтгэгдэлд www.Govialtai.mn сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг устгах эрхтэй!
Бусад
