Сурагчдад “Замын хөдөлгөөний цагаан толгой” зааж байна

Замын цагдаагийн албанаас хүүхдүүдэд Замын хөдөлгөөний дүрмийн анхан шатны мэдлэг олгох зорилгоор ерөнхий боловсролын сургуулийн бага, дунд ангийн сурагчдын дунд “Ногоон гэрэл-Цагаан шугам” аяныг гурав дахь жилдээ амжилттай зохион байгуулж байна.

Уг аяны хүрээнд ерөнхий боловсролын сургуулийн сурагчдад “Замын хөдөлгөөний цагаан толгой” сэдвээр сургалт орохоос гадна хүүхдүүдэд замын хөдөлгөөнд оролцохдоо анхаарах зүйлсийн талаар зөвлөмж бүхий номын хавчуурга бэлэглэж буй юм.

Хүүхдийг зам тээврийн осол, хэргээс урьдчилан сэргийлэх ажилд жолооч, эцэг, эх, асран хамгаалагчдын үүрэг хариуцлагыг нэмэгдүүлэх зорилгоор хүүхдэдээ зөв үлгэр дуурайл үзүүлж гарц гарамтай хэсгээр хөтөлж зам хөндлөн гарч байгаа, хүүхдийг зориулалтын суудал, хамгаалах бүс хэрэглэн тээвэрлэж байгаа эцэг, эх жолоочийг урамшуулан “Сайн жолооч” уриалгыг хэрэгжүүлж, бүтээгдэхүүнийхээ дээжээс бэлэглэх зэргээр олон нийтийг хамарсан үйл ажиллагаа зохион байгуулж байна.

Есдүгээр сарын 10-ны өдөр Тээврийн цагдаагийн албанаас нийслэлийн Хан-Уул дүүргийн 115 дугаар сургуулийн бяцхан багачууддаа мэдлэг олгож, баярлуулсан ба уг аян есдүгээр сарын 10-аас 14-ний өдрүүдэд нийслэл хотын хэмжээнд үргэлжлэх юм.