ТУРУУТАН АМЬТАД ИДЭШ ТЭЖЭЭЛИЙН ХОМСДОЛД ОРЖЭЭ

Нийслэлийн Байгаль орчны газраас 2017 онд анх удаа ногоон бүсийн зэрлэг амьтдад идэш тэжээл, хужир мараа тавих ажлыг зохион байгуулж байсан. Тэгвэл энэ жил хоёр дахь удаагаа  тус ажлыг эхлүүлсэн байна. Байгаль хамгаалагчдын ажиглалтаар халиун буга, бор гөрөөсөөс эхлээд туруутан амьтад идэш тэжээлийн хомсдолд орж туйлдсан байгаа нь амьтдын цасан дээр үлдээсэн мөр, унасан үс болон зэрлэгшсэн нохойд бариулж байгаа зэргээс харагджээ.

Энэ удаагийн  биотехникийн арга хэмжээг зэрлэг амьтдын гүйдэл ихтэй Баянзүрх дүүргийн 20 дугаар хорооны нутаг дэвсгэр болох Дээндийн амны 2 цэгт 20 боодол өвс тэжээл тавих байдлаар зохион байгуулсан аж.

Уг ажилд ан амьтны мэргэжлийн байгууллага  “Агнуур судлалын нийгэмлэг” ТББ, Гачуурт хэсгийн байгаль хамгаалагчид болон иргэд идэвхитэй оролцон бөгөөд цаашид тус ажлыг үе шаттайгаар үргэлжлүүлнэгэж Нийслэлийн Байгаль орчны газраас мэдээллээ.