АН-ын удирдлага Ц.Элбэгдоржийн гишүүнчлэлийг сэргээсэн ч УИХ-д нэр дэвших тойрог өгөхгүй гэжээ

УИХ-ын ээлжит сонгууль нэг жил хагасын дараа болох гэж байна.Үүнтэй холбоотойгоор МАН, АН УИХ-ын 2020 оны сонгуульд нэр дэвшигчдээ эхний байдлаар ярьж эхэлжээ.

"Нэгдмэл Монгол" хөдөлгөөн байгуулж буй Н.Алтанхуяг, Гэр Хороолол Хөгжлийн нам байгуулаад хэвлэлийн төлөөлөгчийнхөө цүнхэнд тамгыг нь хадгалуулчихсан Э.Бат-Үүл нарын хувьд АН-ын дарга С.Эрдэнэтэй тохироо хийж, УИХ-д нэр дэвших эрх олж авахаар "шантааж" хийж буй тухай эх сурвалж өгүүлж байна.

Ингэхдээ Э.Бат-Үүл 8, Н.Алтанхуяг 15 УИХ-д нэр дэвших квот нэхэж буй аж.

Харин АН-ын дарга С.Эрдэнийн хувьд  АН-аас УИХ-ын 2020 оны сонгуульд нэр дэвшигчдийн талаас илүү нь шинэ хүн байх ёстой гэсэн байр суурь баримталж буй аж.

Тэр бүү хэл Монгол Улсын Ерөнхийлөгч асан Ц.Элбэгдоржийн АН-ын гишүүнчлэлээ сэргээх хүсэлтийг дуртайяа хүлээн авна, харин УИХ-ын 2020 оны сонгуульд АН-аас нэр дэвшүүлж чадахгүй гэсэн байна. Түүнчлэн Элбэгдоржийн хүү Эрдэнийг ч  АН-аас УИХ-ын, НИТХ-ын 2020 оны сонгуульд нэр дэвшүүлэх боломжгүй гэж урьдчилсан байдлаар тогтсон гэнэ.

Өөрөөр хэлбэл Монгол Улсын Ерөнхийлөгч асан Ц.Элбэгдоржийг өөрөө болон хүүгээрээ дамжуулан улс төрд шууд оролцох боломжийг АН-ын өнөөгийн удирдлага олгохыг хүсэхгүй байгаа бололтой.

П.Мандах