Аймгийн 26 цэгт 200 алба хаагч хяналт шалгалтын ажлыг гүйцэтгэж байна

Улсын хэмжээнд тѳв суурин газруудад зорчигч, тээврийн хэрэгслийн орох, гарах хөдөлгөөнийг хязгаарласантай холбогдуулан Говь-Алтай аймгийн 26 цэгт 200 алба хаагч 24 цагаар үүрэг гүйцэтгэн хяналт, шалгалтыг үргэлжлүүлэн зохион байгуулж байна.

Хяналт шалгалтын ажлыг тус аймгийн Цагдаагийн газар, Онцгой байдлын газар, Мэргэжлийн хяналтын газрын хамтарсан багийнхан ард иргэдийн аюулгүй байдлыг сахин хамгаалж, төрийн шийдвэрийн хэрэгжилтийг ханган ажиллаж байгаа ажээ.

2020 оны хоёрдугаар сарын 23-ны өдрийн 08 цагаас 27-ны өдрийн 08:00 цаг хүртэлх хугацаанд төв суурин газруудад орох, гарах хөдөлгөөнийг хориглож байсан бол Улсын онцгой комиссын шийдвэр, аймгийн Засаг даргын А/102 дугаар захирамжаар гуравдугаар сарын гуравны 08:00 хүртэлх хугацаагаар сунгалаа.

Иймд иргэн бүр хариуцлагатай байж, Онцгой комиссын шийдвэрийг хэрэгжүүлж, алба хаагчдын үйл ажиллагаанд хүндрэл учруулахгүй, хууль хяналтын байгууллагын алба хаагчийн тавьсан хууль ёсны шаардлагыг хүндэтгэн биелүүлэхийг тус аймаг дахь Цагдаагийн газраас анхаарууллаа.

Э.Нарангэрэл